Belenos, la divinitât panceltiche venerade a Aquilee

Sflandorôs, tant che une sclese di lûs: Bel Eni, Siôr di Aghe e di Fûc, divinitât panceltiche
venerade tes planis de penisule Iberiche fin jenfri il scûr dai boscs de Galie, vie sui tumui
antîcs de Britanie, tai cerclis di piere de Irlande, sui crets dal Balcans fint a Beograd, la citât blancje, e plui jù ancjemò, jenfri i Galatoi de Anatolie. E massime in Aquilee. Protetôr da la Citât, lu vioderin scombati plui di cualchi volte parsore dai siei muraons, involuçât intune flame di fûc, come che nus contin lis cronachis dai antîcs. Nus restin altârs e lastris di piere a lui dedeadis, cul so non e lis sôs preieris. Il pelegrin che al ves seguît il flum Akilis, che al à dat il non a la citât di Akileia, al sarès rivât a la plane
dal Lusinç, e po dopo al Vipau, il Flum Frêd, come che lu clamavin i latins, e vie, di aghe
in aghe al Danubi e sù insom, come che al contave il grêc Strabon, fin a la rive di un mâr grandonon, inglaçât, là che il cjâf cuviert di flamis dal Diu Belenos si poie e la sô lûs, al contat cu la aghe, si solidifiche in lagrimis di ambre. Che propite traviers Aquilee e jentrave tal circuit comerciâl dal Imperi roman: talisman potent cuintri ogni mâl, chê piçule piere brunide e conservave dute la fuarce e il misteri dal soreli. Inte gnot nere e paurose dal Solstizi di Unvier, cuant che frêt, scûr e glace a somein vinci su la vite, e la gnot, lungje plui che mai, e par vê glotude ogni sperance di salvece, i nestri antenât a piavin i fûcs parsore dai cuei, a fasevin rondolâ rovedis ferventis di flamis jù pa lis cuestis dai monts, clamant a grande vôs chel Diu parcè che al tornàs a scjaldâ la Tiere, puartant la sperance che l’Om nol sarès stât condanât a vivi par simpri involuçât dai braçs de Muart. Il timp di chê fieste al durave un mês, dai 6 di Dicembar ai 6 di Zenâr, culminant inte gnot dai 24, cuant che il Sol Invictus dai romans, il Belenos dai Celts, la Lûs dai popui indoeuropeans e deventà la Sante e Mistereose Gnot dai Cristians. Magjiche, plene di sugjestions che nus compagnin indaûr di secui, ingerdeade intun glimuç di rituâi, crodincis, maraveis che la Glesie Mari di Aquilee e à savût meti adun tal so milenari percors di Evanzelizazion dai popui sogjets a la sô Catedre. Nus restin i simbui e lis figuris di chel Diu antîc, platât daûr dai nons di sants, e dai rituâi: Nicolau, che al ven fûr dal bosc compagnât dai Krampus, Sante Luzie, Siore de Lûs, il Nadalin che al bruse planc tal fogolâr, là che a restin in spiete dute la gnot i spirts dai antenâts, e la Pasche Tafanie, cui siei pignarûi e lis Cidulis, e la benidizion de Aghe e dal Fûc, par che il Diu de Vite al rivi a vinci ancjemò e par simpri su la pôre de Muart. Par une ufierte di sâl, aghe, fen dongje dal camin di cjase, come che ancjemò e fâs la canaie in spiete, il regâl dal Sant al disvele il so passaç cjase par cjase. E ancje nô, che no vin mai pierdude chê anime frutine, spietìn tal scûr che la flame no si distudi. Bon Nadâl a ducj.
Agnul Floramo

Ebreus sot de crôs di Aquilee

Tito, imperadôr dai Romans, tal an 70 de Incjarnazion di Crist, par risolvi il probleme de resistence ebraiche cuintri des legjons di Rome, al decidè di sdrumâ jù Jerusalem cul so Templi, propit chel famôs tirât sù dal re Solomon, stropant chel fenomen che i storics a àn clamât “Diaspore”, ven a stâi la migrazion dal Popul dai Ebreus par dut il Mediterani, de Grecie fint in Spagne, de Galie fint in Anatolie. Là che e jere une grande citât, lì si insediavin lis comunitâts, cu la sperance di podê tornâ a costruî, cul leam di une Lenghe e di une Fede condividude, ce che la spade imperiâl e veve taiât fûr de Storie. I agns setante dal prin secul de Ete Cristiane a forin fondamentâi pe difusion dal messaç cristian, e par plui di cualchi studiôs propit la difusion dai Ebreus par ducj i teritoris che a jerin controlâts di Rome al à judât cheste straordenarie difusion. Si pense che i cuatri Vanzei canonics, insieme cun ducj chei altris, i Apocrifs, a sedin stâts scrits propit tal zîr di chei agns alì.
LEAM ALESSANDRIE-AQUILEE_Ancje Aquilee, une des plui grandis metropolis romanis dal timp, e à viert lis sôs puartis a une grandeose comunitât ebraiche. Il colegament cun Alesandrie di Egijt par di plui, comerciâl, economic e culturâl, al à incentivât chest flus di ebreus, che no jerin dome mercjadants, ma ancje inteletuâi, scritôrs, scienziâts, mestris, interpretis e comentadôrs des sacris scrituris. A forin propit lôr i prins a vierzi il pinsîr a la Buine Gnove di chel rabin che al veve non Joshua, fì di Josef, e che cuarante agns daspò de sô muart al jere za sogjet a une venerazion che si stratificave su lis culturis che e incuintrave su la sô strade, si miscliçave cun mitologjis e contis une vore plui antighis, dai deserts de Persie fint ai boscs de Britanie, al cjapave vite in virtût di un imagjinari sflandorôs e magnetic viert a lis contaminazions e al dialic cu lis altris culturis, nudrintsi cun lôr e produsint un sisteme complicât e maraveôs di simbui e significât bogns di fevelâ ai popui plui lontans.
LIS LIDRÎS DI UNE CIVILTÂT_Il stes Vanzeli di Sant Marc, definît mistereosamentri Terapeaut e Guaridôr, al è il fi di cheste rivoluzion filtrade des comunitâts ebraichis in tiere furlane. E Terapeuts a jerin clamâts ancje chei sapients ebreus, in Alessandrie di Egjit, che a praticavin il cult de aghe di risultive, colegade a la idee dal passaç, la vie rituâl dal cuarp e de anime viers la salût de salvece, un grop filosofic e religjôs che al è stât la fonde de Profession di fede de Glesie di Aquilee. Insediâts tes campagnis indulà che a podevin venerâ cheste aghe benefiche e purificadore, a formarin une comunitât là che la antighe sapience bibliche si cumbinave cul Vanzeli e e cjapave dentri imagjns e sugjestions lassadis in ereditât dai popui che prime di lôr a vevin traviersade la nestre Tiere. Lis piçulis gleseutis dedeadis a Sante Sabide, e bielzà dal non si capìs che a rapresentin un moment di transizion tra la religjon ebraiche e chê cristiane, simpri tiradis sù dongje di aghe di risultive, a son la antigone testimoneance di cheste presince, indagade di pre Guglielmo Biasut e di pre Gjilbert Presac. Ma ancje il tapêt di mosaics de Basiliche, tal so spetacul di colôrs, nemâi, pes e oms, arbui e aghis, nus fevele cu la vôs dal Simbul di chel stes alfabet, come che i professôrs Remo Cacit e Gabriel Pelizzari a stan dimostrant tai lôr studis. E alore Filon di Alessandrie, il Pastôr di Erma, il grop di Salomon, il Segn di Gjone si intortein insieme par contânus une storie che par ignorance o par malicie nissun nus insegne a scuele, e che invezit e rapresente la rêt di une Civiltât che nus à regalade no dome lis lidrîs, ma ancje il butul florît de nestre identitât.
Agnul Floramo

I Benandants: storie e liende di chei nassûts cu la cjamese

A scombatevin cu la mace dal fenoli, svolant tal cîl de Patrie vie pe gnot, i difensôrs dal Ben cuintri lis fuarcis dal Mâl. Une lote eterne tant che l’om, cuant che il Mont al jere plui zovin di cumò e al rivave a fâ scaturî dal scûr di une gnot cence lis stelis siums, vôs, sgrisui e meracui. La culture furlane, lu savìn ancje in merit ai plui che preseâts studis resints di Gilberto Pressac e di Carli Ginsburg, e je impastade di secui in mil e mil tramis, nassudis dal incuintri di popui che a vignivin di lontan, passâts par chi di nô semenant sapience e sugjestions. Lis tradizions antighis si peavin dongje gjenerazion dopo gjenerazion: la dutrine cristiane de prime evangjelizazion, chê di Sant Marc, e cjatâ un teren bon di fâ nassi storiis e liendis che nus contin di rituâi par difindi la tiere e il lavôr dal om, stranît devant di une Nature potente e divine, che e deve la vite come la muart, la bondance tant che la miserie.
TRA MAGJIE E REALTÂT_Une Nature sacrâl, di imbunî tal timp de Fieste cun cjants, processions, formulis e preieris. I nestris vons a crodevin che in cierts moments dal an i confins che a separavin la dimension dal magjic e dal soreuman di chê de vite di ogni dì si fasessin plui lizêrs, mancul definîts. Come se i tiermins stabilîts par simpri in chei dîs a vignissin gjavâts vie di fuarce par une leç misteriose. E cussì in chei moments si vierzevin lis puartis dal divin. Vîfs e muarts, animis e diaui, ombris e marums a cjaminavin sui trois dai cjamps, a traviersavin lis contradis dai paîs. La pôre e la maravee a tucavin su la puarte di ogni cjase. In chei moments, che a coincidevin cui ciclis eternis dal soreli e de lune, ven a stâi i solstizis e i ecuinozis, la magjie dal Mont si faseve plui fuarte. Tant chê buine che chê triste, chê blancje come chê nere. In chei dîs sacrâi, che la Glesie des origjins e cirî di cristianizâ inmaneant su di lôr rituâi cristians, i famôs “quatuor tempora” (a colavin tal prin miercus, vinars e sabide di ogni stagjon), i striaments dai arbolâts a podevin sei sconzurâts dome di chei fîs dal om che a fossin stâts segnâts fin de lôr nassite di un podê straordenari.
FIGURIS SIAMANICHIS_O stin fevelant dai Benandants, oms e feminis nassûts cu la cjamese, ven a stâi involuçâts tal sac amniotic. Un segnâl, un destin. Cuant che ducj a durmivin, lôr a lassavin il lôr cuarp uman tal jet, e intun svol fatât a fermavin il Mâl e i siei servidôrs. Se lôr a vincevin bon al sarès stât il racuelt, buine la anade dal vin, san al sarès nassût il vidiel. In câs contrari “a fulgure et tempestate, libera nos Domine”, si salmodeave tes rogazions vie pai cjamps, ripetint in formule cristiane chel che i arbolâts pagans za a fasevin di centenârs di agns. Figuris peadis al profîl antropologjic de nestre int, finîts tal ‘500 jenfri i manuscrits de Sante Incuisizion, testemoni il mulinâr Menocchio di Montereâl Valceline, sconfondûts dai “studiâts” cun superstizions ereticâls, ma spieli intrigant di une culture popolâr penze di riferiments bogns di cjapâ dentri intun colp Alessandrie di Egjit cui siamans de stepe Orientâl.
BENANDANTS VUÊ_Ancje cumò, in dì di vuê, o varessin bisugne dai Benandants. Cumò che il Mâl al à metude sù une muse piturade di bonvolê: il desert de globalizazion, i striaments de economie, la tristerie dai sorestants, la pôre di fâ valê la nestre identitât, scjampant tal grum cence colôrs di un mont dut compagn. Lis macis di fenoli no bastin plui. Bisugne armâsi di amôr. Amôr e passion pe memorie di ce che o sin stâts par cjatâ fûr la fuarce par vivi la vite dal nestri popul come un progjet di condividi cu lis gjenerazions che a vignaran dongje. Insome fâ come chei Benandants, che cuant che ducj chei altris a durmivin il sium dai stupits, lôr a veglavin atents, fin ae prime lûs de aurore. Parcè che al è miôr murî di eretic che no vivi di dordel.
Agnul Floramo