Pardabon un Bon Nadâl e un Bon 2013

O sin rivâts ae fin di une anade particolâr: chest 2012 al è stât plen di events che intune
maniere o in chê altre a àn segnât la vite des personis. A nivel personâl, ma ancje, o disarès, a nivel public. O stin passant un moment di profonde trasformazion intal mût di vivi, dât dal fat che simpri di plui o vin di fâ i conts cun ce che al sucêt inte societât, inte
economie e inte politiche. Intun mont che al cor plui di corse di nô, o vin forsit di fermâsi
un momentut par cirî di capî miôr ce che o podìn fâ par nô e par chei altris.
In sostance, o vin di fâ ducj la nestre part in cheste vite e in chest mont: impegnâsi inte
vite privade ma ancje in chê publiche, puartâ indenant lis nestris ideis, cun passion e perseverance, cirint di dâ il nestri contribût in maniere costrutive. Mi somee naturâl duncje, fâus insiemit cui auguriis di Bon Nadâl e di un bon 2013, fâus ancje l’auguri e la esortazion a impegnâsi, scomençant, parcè no, magari scrivint alc, une opinion, un pinsîr ancje par Crôs di Aquilee, par fâ deventâ il sfuei un vêr moment di incuintri e di scambi di opinions.
Par intant, auguris di cûr a ducj!
Cinzia Collini

Editoriâl

Capî parcè che un salût al è cussì impuartant, scuvierzi jenfri lis pleis de nestre storie di popul furlan ancje i segns di altris culturis e di altris popui e je simpri une robe maraveose.
No a câs in chest gnûf numar di Crôs di Aquilee, o vin tancj contribûts - in particolâr mi permet di segnalâ l’articul di pre Tunin su la presince dai ebreus in Friûl, un argoment ce tant tratîf e misteriôs - che nus fâs viodi une lûs diferente sul nestri teritori.
Tantis voltis no si rindìn cont di ce che o vin intal nestri Friûl e il valôr de nestre culture. O varessin forsit di stâ un moment di plui a pensâ a chês che a son lis nestris lidrîs, il fondament di dute la nestre culture. Un aprofondiment su la culture furlane no vûl dî jessi nostalgjics e cjalâ indaûr, une maniere cuasi par nascuindisi e sierâsi intal nestri cjantonut. Sielzi di capî e cognossi la nestre lenghe, la nestre culture e di dulà che o vignìn, al è un esercizi che o vin di intindi come une robe biele, une robe che nus puarte ricjece e che nus fâs cressi inte cussience di ce che o sin stâts par capî miôr ce che o sin vuê.
Une peraule ancje su altris dôs tematichis che a mertin di jessi ricuardadis. Prin di dut, il ringraziament a ducj chei che la volte passade a son vignûts a Coder a viodi un toc di storie e di culture dal nestri Friûl, la cjase di David Maria Turoldo. Daspò, o ricuardìn, ancje se cun pocjis riis, i cuindis agns de muart di Gilberto Pressac, un om che al à dât tant pe riscuvierte de storie furlane, e che cu lis sôs ideis al à passionât cetantis personis a scuvierzi la bielece de culture dal nestri Friûl.
Cinzia Collini

Di gnûf in vore

A scomençâ di cheste tempora al torne il sfuei dai Benandants, grazie soredut ae disponibilitât e la buine volontât dai Furlans di doman. Chest gnûf – disìn, miôr, rignuvît – sfuei al è e al sarà a disposizion dai Benandants e di ducj chei che a vuelin leilu. Oltri che pe leture, l'invît al è ancje a colaborâ e a scrivi parsore.
Pluitost che criticâ al è simpri miôr cirî di comedâ e dâ un contribût par miorâ la situazion. La Crôs di Aquilee, tes intenzions, al vûl restâ un sfuei di informazion, sempliç, e cence pretesis par comunicâ dentri de Confraternite dai Benandants, ma al è cu lis orelis spiçadis par sintî ce che al capite tal mont e par jessi atent ai problemis e a lis necessitâts dal Friûl e dai Furlans.
Al è duncje il numar cuatri, ma il prin di une gnove serie che o sperìn e vedi plui furtune. Un grazie di cûr, za di cumò, a ducj chei che a àn dade e a dan une man.
O sieri chestis pocjis riis ricuardant il prof. Renato Iacumin, che al è tornât te cjase dal Pari cualchi zornade indaûr. I Benandants lu àn tant agrât parcè che a àn vût l'onôr di vêlu ospit ai 6 di Març dal 2003 propit a Coder di Sedean dulà nus veve regalade une conference su la sô grande passion: i studis su la Basiliche Mari di Aquilee. Cheste volte a Coder nol sarà lui a fevelânus, ma o sin convints che di là sù nus cjale. Mandi Renato!
Cinzia Collini