Preiere di Nadâl

Ven jù Signôr
dal to cîl di glorie,
ven a comedâ la nestre storie.

Ven jù Signôr
in cheste puare Tiere,
là che a regnin
svindic, fam e vuere.

Ven jù Signôr
a sfantâ la pôre e il scûr,
a morestâ e a sclipî il nestri cûr.

Ven jù ancje vuê
come chê dì a Betlem,
ven a viodi dal puar
e di chel che al zem.

Ven jù in chest mont
simpri plui forest:
dome cu la tô gracie
si podarà meti in sest.

Ven jù Signôr
dal to biel cîl stelât,
ven a viodi dal mont
che al è malât.

Ven jù Signôr
a fânus il grant regâl
dal perdon e de pâs
come tal prin Nadâl.
pre Antoni Beline

Apontaments, recensions e incuintris

Giorgio Ferigo e il Povolâr Ensamble
Daspò de presentazion uficiâl dal progjet – par cure de Cjase editore Forum e de Associazion Giorgio Ferigo, che e à publicât un cofanet cuntun volum e 4 cd – che si è tignude a Udin ai 27 di Novembar, ai 18 di Dicembar li dal “Palamostre” di Udin, aes 8 e mieze di sere si tignarà une serade in onôr di Giorgio Ferigo e dal Povolâr Ensamble. La serade e sarà dedicade aes musichis e ai tescj dal grup, cu la intenzion di fâ cognossi lis cjançons dal Povolâr.

Di terra e di ghiaia
Ai 31 di Zenâr al vignarà presentât un gnûf volum edit da la associazion “La Grame”, par cure di Susi Corazza e Giulio Simeoni dal Dipartiment di Storie e tutele dai Bens Culturâi dal titul “Di terra e di ghiaia”. Il libri al trate de storie dal Friûl prime de dominazion romane. Intal libri a vegnin mostrâts i risultâts di ducj i studis fats intai ultins 30 agns, in maniere divulgative e vierte a ducj: de nassite dal paisaç monumentâl, al disvilup e a la fin de ete dai cjastelîrs, la forme insediative che e à caraterizât dute la protostorie dal Friûl, struturis che inmò vuê a son ben visibilis inte plane furlane. Par informazions: aclagrame@libero.it

Jessi… come il “purcit di Sant Antoni”

Par tradizion, ae fin di Novembar, o miôr a Sant Andree il purcit al finìs su la bree.
Tes nestris cjasis no mancjin luianiis, salams o sopressis e, cuant che si fevele di persut, il pinsîr al va simpri a chel di Sant Denêl (cence nuie gjavâ a chel di Sauris).
Pensant al purcit, al persut e a Sant Denêl no si pues dismenteâ che propit culì, tal cûr dal Friûl, si cjate une glesie dedeade a Sant Antoni, protetôr dai contadins, dai arlevadôrs e dai nemâi, ma soredut preât par vuarî dal fûc che al puarte il so non, val a dî l’Herpes zoster. Al è par chest che pitôrs e scultôrs lu rapresentin o cul fûc in man o cuntun purcitut Ogni an, ai 17 di Zenâr, i nemâi a vignivin benedîts e metûts sot de Te Ete di Mieç, come in tancj altris paîs ator pe Italie, a Sant Denêl e jere presinte la fraterne di Sant ai pelegrins. Chest Ordin al veve il permès di tirâ sù dentri dai paîs i purcits che, cuntun campanel tal cuel, a podevin cori libars e jessi nudrîts de comunitât. I Antonians a podevin fâlu par vie che cul gras di chescj purcits si faseve l’onzint par chei che a vevin l’Herpes zoster, o fûc dal Sant.
Come che al capite dispès, cheste tradizion e à lassât une olme te lenghe furlane.
Cui no si isal mai sintût dî, di zovin, dal pari o de mari: “Tu sês propite come il purcit di Sant Antoni”? I zovins, come il purcitut dai Antonians, a son simpri indenant, no àn tiere ferme, a van ator ca e là cui amîs dismenteantsi di vê une cjase. Par chest, cuant che a tornin tart, si sintin dî cussì, ma par fortune lôr… Sant Andree e je une zornade come une altre!
Stefania Agostinis

Scriptorium Forojuliense, une scuele gnove par une art antighe

Tal ultin incuintri dai Benandants o vin vût il plasê di presentâ ai tancj amîs il Vanzeli di Marc te version par furlan trascrite in gotic dal amanuens Roberto Giurano e ilustrade di Otto D’Angelo. Il libri al è stât publicât grazie al interesament e cul contribût de Provincie di Udin.
La publicazion di chest libri nus à dât il sburt par fondâ il Scriptorium Forojuliense, la scuele par amanuens dal Friûl-VJ.
Sabide ai 17 di Novembar, aes 6 di sere la scuele e je stade presentade a la int. Public des grandis ocasions cuntune sale riunions plene di studiôs, passionâts e ancje curiôs, seneôs di cognossi cuâi che a saran i progjets che chest gnûf sodalizi al à metût in vore pal 2013. Impuartantis lis autoritâts presintis, oltri che i parons di cjase, il sindic di Ruvigne Mirco Daffara, ancje il President de Provincie di Udin Pietro Fontanini, compagnât dai assessôrs Adriano Piuzzi e Elena Lizzi, che e à ancje fat di santule de serade, il president dal consei provinciâl Marco Quai e l’assessôr a la culture de Regjon
Elio De Anna. A son intervignûts pre Tonin Cjapielâr, plevan e vicepresident dal Scriptorium e il prof. Angelo Floramo, president, che adun cul Grant Priôr dal Ordin neotemplâr dot. Grandis a àn metût in evidence la impuartance di un sodalizi che al viodi
de scriture intun contest storic cussì fertil e cjamât di tradizion come che al fo il teritori dal Patriarcjât di Aquilee, che sul so troi la associazion e à voie di continuâ. L’amanuens Roberto Giurano, anime e ideatôr de iniziative, al à ufi ert al public sponts interessants su la art de biele scriture, doprant ancje bielis imagjins metudis a disposizion de Biblioteche Guarneriane di Sant Denêl, za pronte par impuartantis iniziativis di colaborazion. Tal grant public ancje l’assessôr regjonâl Claudio Violino e il conseîr Enio Agnola.
Paolo Marcuzzi

Il Missus, la tradizion musicâl patriarcjine tal Nadâl in Friûl

La novene di Nadâl in Friûl e je di simpri stade caraterizade dal cjant dal Missus. Tant che la int no diseve mai “O voi a la Novene di Nadâl”, ma “O voi al Missus”.
Il Missus al è un toc di Vanzeli (Lc 1,26-38), che al conte il fat de Anunciazion: l’agnul Gabriel che al va di Marie e i conte de nassite di Gjesù. Il test latin al tache propit cussì: Missus est Angelus Gabriel a Deo… (L’agnul Gabriel al è stât mandât di Diu…). E la prime peraule dal test i da il non a la Novene.
Cheste tradizion si cjate dome in Friûl, stant che par dut il mont catolic la Novene si le à simpri celebrade in maniere diferente. Cemût culì ise cheste origjinalitât? Grancj studis e ricercjis no son mai stâts fats, a part un articulut di mons. Giuseppe Vale dal 1905. Bisugne lâ indaûr te Ete di Mieç, cuant che te glesie aquileiese si jerin svilupâts e a jerin une vore doprâts i “Drammi sacri”.
Midiant di sacris rapresentazions si riproponevin, in cjant, i moments plui significatîfs de vite di Gjesù. Di chescj “Drammi sacri” o ricuardìn i plui innomenâts: Planctus Mariae, Visitatio Sepulchri, Resurrectio e Rappresentatio in Annunciatione beatae Mariae Virginis (Il Lament de Madone dapît de Crôs, La Visite al Sepulcri, La Resurezion, e la Anunciazion).
A la fin dal 1500 subit dopo dal Concili di Trent, il patriarcje Francesc Barbaro al abolì la liturgjie aquileiese e ancje chestis rapresentazions, ma al fo il stes patriarcje che al fasè traspuartâ il cjant dal Missus de fieste de Anunciazion a la Novene di Nadâl, lassant in bande la part che e rivuardave la visite e Elisabete e sostituint la Antifone “Salve clara” cul Responsori Jesus Christus. Te forme atuâl, duncje, al è di sigûr di chel timp che si celebre in cheste maniere la Novene.
La tradizion furlane a ‘nd à tramandadis une vorone di melodiis patriarcjinis dal Missus che, come che al scriveve pari Pellegrino Ernetti, munic benedetin “sono assai suggestive e venerande quasi tutte in modo dorico e spontaneamente armonizzate dallo stesso popolo che improvvisa la medesima armonizzazione con un gusto davvero raro e singolare” (RDU n. 4 luglio 1978 pag. 8).
Dongje des melodiis patriarcjinis o vin ancje tancj Missus che autôrs di ogni ete a àn componût in maniere plui elaborade par coros e par cantôrs plui alenâts. Si son spiticâts a componi: G.B. Tomadini, Zorzi, Pecile, Comencini, Girardi, Candotti, J. Tomadini, Marzona, Franz, Cossetti, Foraboschi, Pigani, Trinko, Perosa, De Lorenzo, O. Rosso… e al dì di vuê Giuliano Fabbro cu la Nunziade. Un patrimoni inestimabil che al sarès ben che la Diocesi e fasès fâ, in merit, un studi aprofondît e curât e une ricercje minuziose e precise cun publicazion di ducj i Missus popolârs e di autôr, prime che dut si pierdi.
Al displâs che al dì di vuê, ta chest mont frenetic, ancje chestis tradizions venerandis e splendidis a vegnin simpri plui butadis di bande e lassadis colâ. In non di ce? Di plui cunfusion e baldorie e vueit…
pre Roman Michelot

Belenos, la divinitât panceltiche venerade a Aquilee

Sflandorôs, tant che une sclese di lûs: Bel Eni, Siôr di Aghe e di Fûc, divinitât panceltiche
venerade tes planis de penisule Iberiche fin jenfri il scûr dai boscs de Galie, vie sui tumui
antîcs de Britanie, tai cerclis di piere de Irlande, sui crets dal Balcans fint a Beograd, la citât blancje, e plui jù ancjemò, jenfri i Galatoi de Anatolie. E massime in Aquilee. Protetôr da la Citât, lu vioderin scombati plui di cualchi volte parsore dai siei muraons, involuçât intune flame di fûc, come che nus contin lis cronachis dai antîcs. Nus restin altârs e lastris di piere a lui dedeadis, cul so non e lis sôs preieris. Il pelegrin che al ves seguît il flum Akilis, che al à dat il non a la citât di Akileia, al sarès rivât a la plane
dal Lusinç, e po dopo al Vipau, il Flum Frêd, come che lu clamavin i latins, e vie, di aghe
in aghe al Danubi e sù insom, come che al contave il grêc Strabon, fin a la rive di un mâr grandonon, inglaçât, là che il cjâf cuviert di flamis dal Diu Belenos si poie e la sô lûs, al contat cu la aghe, si solidifiche in lagrimis di ambre. Che propite traviers Aquilee e jentrave tal circuit comerciâl dal Imperi roman: talisman potent cuintri ogni mâl, chê piçule piere brunide e conservave dute la fuarce e il misteri dal soreli. Inte gnot nere e paurose dal Solstizi di Unvier, cuant che frêt, scûr e glace a somein vinci su la vite, e la gnot, lungje plui che mai, e par vê glotude ogni sperance di salvece, i nestri antenât a piavin i fûcs parsore dai cuei, a fasevin rondolâ rovedis ferventis di flamis jù pa lis cuestis dai monts, clamant a grande vôs chel Diu parcè che al tornàs a scjaldâ la Tiere, puartant la sperance che l’Om nol sarès stât condanât a vivi par simpri involuçât dai braçs de Muart. Il timp di chê fieste al durave un mês, dai 6 di Dicembar ai 6 di Zenâr, culminant inte gnot dai 24, cuant che il Sol Invictus dai romans, il Belenos dai Celts, la Lûs dai popui indoeuropeans e deventà la Sante e Mistereose Gnot dai Cristians. Magjiche, plene di sugjestions che nus compagnin indaûr di secui, ingerdeade intun glimuç di rituâi, crodincis, maraveis che la Glesie Mari di Aquilee e à savût meti adun tal so milenari percors di Evanzelizazion dai popui sogjets a la sô Catedre. Nus restin i simbui e lis figuris di chel Diu antîc, platât daûr dai nons di sants, e dai rituâi: Nicolau, che al ven fûr dal bosc compagnât dai Krampus, Sante Luzie, Siore de Lûs, il Nadalin che al bruse planc tal fogolâr, là che a restin in spiete dute la gnot i spirts dai antenâts, e la Pasche Tafanie, cui siei pignarûi e lis Cidulis, e la benidizion de Aghe e dal Fûc, par che il Diu de Vite al rivi a vinci ancjemò e par simpri su la pôre de Muart. Par une ufierte di sâl, aghe, fen dongje dal camin di cjase, come che ancjemò e fâs la canaie in spiete, il regâl dal Sant al disvele il so passaç cjase par cjase. E ancje nô, che no vin mai pierdude chê anime frutine, spietìn tal scûr che la flame no si distudi. Bon Nadâl a ducj.
Agnul Floramo

Pardabon un Bon Nadâl e un Bon 2013

O sin rivâts ae fin di une anade particolâr: chest 2012 al è stât plen di events che intune
maniere o in chê altre a àn segnât la vite des personis. A nivel personâl, ma ancje, o disarès, a nivel public. O stin passant un moment di profonde trasformazion intal mût di vivi, dât dal fat che simpri di plui o vin di fâ i conts cun ce che al sucêt inte societât, inte
economie e inte politiche. Intun mont che al cor plui di corse di nô, o vin forsit di fermâsi
un momentut par cirî di capî miôr ce che o podìn fâ par nô e par chei altris.
In sostance, o vin di fâ ducj la nestre part in cheste vite e in chest mont: impegnâsi inte
vite privade ma ancje in chê publiche, puartâ indenant lis nestris ideis, cun passion e perseverance, cirint di dâ il nestri contribût in maniere costrutive. Mi somee naturâl duncje, fâus insiemit cui auguriis di Bon Nadâl e di un bon 2013, fâus ancje l’auguri e la esortazion a impegnâsi, scomençant, parcè no, magari scrivint alc, une opinion, un pinsîr ancje par Crôs di Aquilee, par fâ deventâ il sfuei un vêr moment di incuintri e di scambi di opinions.
Par intant, auguris di cûr a ducj!
Cinzia Collini