Par chest test invezit o vin decidût di ripuartâlu come che lu veve scrit ta chê volte, cuant che al doprà diviersis soluzions che po no jentraran te grafie uficiâl: la c cu la pipe, la z finâl e la n prime da la p e da b, l’ûs dal apostrof tal pronon relatîf e vie indenant.
Lu vin fat propit pe adesion complete al test e ancje dal pont di viste storic par testemoneâ de ricercje che pre Toni al faseve rivuart al metri di scriture.
La redazion
No soi mai stât milenarist e partant no crôt ’es grandis svoltadis ch’a varessin di capitâ te storie ogni mîl agn e nancje no che chesc’ ch’o vivin a sedin i ultins timps.
Il troi dai onps al è lent e grivi e tantis voltis balarin e malsigûr, ma cjalant ben si viôt ch’al è simpri un lâ indenant, parceche l’onp, se dome al à un pêl di buine volontât, al sa jessi ancje inteligjent, biel restant l’animâl di simpri.
O crôt partant che l’onp al varà un avignî. Un avignî che nol ripetarà ce ch’al è stât. Chest nol è pussibil. Però si pearà al passât, par santescugne. Ogni gote dal flum e jè l’ultime di chês che àn corût denant di jê e la prime di chês ch’j vignaran daûrj, par vie che il flum al è peât in se stes midiant de continuitât de novitât. Pa la cuâl o crôt che l’avignî al sarà difarent dal passât, ancje se si fondarà ungrum sul passât, un passât lontan pitost che sdongjât, parceche lis etis a saltin par solit un scjalin. La storie e jè mermorie.
O crôt che i omps di doman a fruçaran i mîts di vuè, parceche e saran spersuadûz che cui mîts no si pò vivi a pat e che cui idui nond’è place pe fede.
A butaran da bande, par esenpli, il mît dal vê, tant puartât in cheste nestre ete materialistiche e sfurnide di puisie. A varan ’nant il jessi. Parceche une societât che à tant e ch’a consume un disordin no jè in stât nè di pensâ nè di creâ. Cuanche si à masse, il çurviel s’impegris e un purcit passût al brame dome di distirasi e di ronfâ. Pa la cuâl i onps di doman a coraran di mancul par podè cjalâ di plui. Salacôr a savaran ancje mancul robis, ma cun tune cussiense plui fonde. L’avignî al è ancje cussiense.
O crôt che i onps a sdrumaran lis piramidis fatis su di lôr, cu lis lôr stessis mans, par tornâ ’e libertât origjnâl dal spirt. Par esenpli, a fasaran mancul l’amôr, seben che a fâlu si à gust e pâs, ma a volaran plui ben, parceche l’amôr al rinfuarcis l’onp.
L’istituzion de famee e sarà mancul fuarte, ma si smicjarà a di une union spirtuâl e morâl plui fonde, pojade su la responsabilitât personâl plui che su lis lez di une societât che nivele ancje lis robis plui santis e che à la pussibilitât orende di fâ deventâ borghês, cragnine e consumistiche ancje la vite morâl.
O crôt che ancje l’istituzion gleseastiche e sarà mancul fuarte, a dut vantaç di une fede plui in sot e in dentri. O varin mancul religjositât ma plui fede. O domandarin di mancul ma o adorarìn di plui. E o larin a cirî chês puaris gleseutis di canpagne e di mont, magari miegis dirocadis; e lis tornarin a meti in sest par un at di fede tai valôrs sorenaturâi e trassendentâi dal onp.
No varin âtri chês grandis folis di int, ma chêi ch’a crodin, un par un, ognun cu la sô lûs a
fasaran lusôr tal troi dal mont. O varin mancul meracui, ma o varin il spieli di une vite plui
vivarose.
O crôt che ancje la struture de scuele a larà di mieç, dopo di vê tradît la funzion ch’a veve: tirà su cheste ete. O vin bandonade la scuele dl mont naturâl, cussì savie, cussì perfete, par sierâsi tai bunkers di siment a sossedâ cun robis muartis o ch’a fasevin ridi. O tornarin al grant libri dal mont, ch’al è il libri de vite. A une civiltât inlidrisade tal mont naturâl.
O crôt che la societât a vignî a savarà fâ sentense ancje dal mît dai stâz e des istituzions
pulitichis, che àn fiscadis lis sengulis nazionalitâz e nazions a dut vantaç dal plui fuart. No podarin sapuartâ âtri une presince di sorepotencis come chê di cumò, che nus sfracae. Une gruesse potence e jè une gruesse prepotence e une gruesse prepotence e bute consumisin ma culture pocje e civiltât nissune. Si deliberarìn dai mîts dai granc’ stâz par lâ a cirî la nestre storie tai popui piçui, che àn une grande culture o, amancul, une culture
gjenuine, robe di restâ a bocje e cûr spalancâz tun mont di plastiche e di eletroniche.
O crôt che l’avignî al sarà grivi, ma l’onp, te situazion grivie, al rifile il sô gust, al rinfuarcis la sô volontât, al cjate tal ostacul une reson par scombati. La vite di cumò e jè plache e vualive, che no pae la pene nancje di vivile. Par chest tanc’ zˇovins si droghin, dopo di vê cjatât che la cjanaipe indiane o l’ashish no son lafè piês de droghe de istituzion, dal partît, de glesie istituzionalisade, dal stât ch’al fâs e al met sul marcjât i mîts.
Stant che lis risorsis dal mont no son cence limit e, dopranlis e danlis fûr malamentri, si suin in tun batût di voli, o varìn etis di grande puaretât, compagnadis di une sfluride dal pinsîr e de art, dal moment che il pinsîr e l’art ur confâs miôr une societât no consumistiche.
O crôt ancje che i onps, tal ultin, a savaran jessi savis, parceche a capissaran il valôr de libertât. Soredut a capissaran che l’intent de sience e de tecniche e di dut il progres di vuè al à di sei une cualitât plui alte de vite, par duc’. Parceche nol à impurtance, ansit al è mâl slungjâ la vite infinamai a cent agn se no si à un parcè di vivi. E il parcè dal vivi al è e al sarà simpri la lote pe libertât interiôr, strade pe libertât ancje spirtuâl, civîl, economiche, sessuâl, sociâl.
O crôt che l’onp al sarà mancul enciclopedic ma plui profont; al sarà mancul religjos ma al crodarà di plui, al varà mancui idui ma al adorarà di plui il Diu vivent e trassendent. O varin mancul teologje ma plui mistiche; mancul razionalìsin ma plui art e puisie.
O crôt che, dopo la grande rivoluzion industriâl volude cence tirâ sul presit, mît che nus
à costât un stragjo par vie ch’o vin scugnût pajâlu a presit di umanitât, o varin une gnove civiltât artesanâl, che si conpagne ma no è la stesse di une volte.
O crôt soredut che Diu nol lassarà ju onps sfurnîz de voe di ridi, dal sintiment e de gole di vivi, dute robe che te gjenerazion di cumò e jè sparide.
O crôt però che no podarin vê maj âtri un paradîs in chest mont, parceche Diu nol à nissun dirit di fant un âtri, e cheste tiere e puartarà par simpri i segnos e lis feridis di une civiltât incivîl e che si mace dibessole. Ma ancje lis feridis a servissaran par no tornâ a fâ, tal prossin grant ciclo, lis macacadis e lis porcariis de civiltât di vuè.
Gries, den 5. Dezember d.J. 1981 - Nacht -
pre Antoni Beline
Nessun commento:
Posta un commento