09/07/12

Salmodie pe int fedêl dal gno Friûl


Int mê torne a la risultive segrete
di dulà che tu aurivis fuarce prodigjose
par misurâti cul destin, e umile
volontât ti judave par no colâ,
e braure ti faseve liende
te fuarce straordinarie: ancjemò
a butin lis lidrîs gropolosis
e adun cu lis corts tal mieç dai cjamps
e resurissi des maseriis la tô
anime nobile, cumò che altre
muart plui mare ti menace.
Une roste tire sù di afiets e ricuarts
cuintri chestis monoculturis di Americhe:
il tesaur difindilu de tô dignitose
puaretât dai vons e la memorie
che e sedi il to blason: memorie
dai tiei gjespui di domenie cuant che
une umanitât in fieste e sborfave
paîs e campagnis: cumò che invezit
madracs di machinis ancje te
ti assediin di ogni strade, e ancje te
ti morose chest incjant furiôs dal Nuie,
e no un spieli aromai nol trasparìs
di gjonde de tôs sagris, e di droghe
fîs ancje tiei, o gno Friûl,
si inflapissin da lis contradis serenis:
tu che tu jeris, Friûl, il paîs râr
dai “miôr fantats”: gno Friûl
torne a jessi chê tiere
che il mont cun invidie al amave,
l’Eden che de Capitâl sdrumade
il to poete al insumiave: un Eden
finalmentri concuistât
dopo de muart inevitabile.
David Maria Turoldo

(voltade par furlan di Christian Romanini)

Nessun commento:

Posta un commento